Fallegustu fossar Suðurlands sem þú mátt ekki missa af
Á Suðurlandi er að finna marga af fallegustu fossum Íslands. Meðfram suðurströndinni steypast kraftmiklar ár fram af klettabrúnum, renna um þröng gljúfur og skapa ógleymanlega náttúrufegurð. Margir þessara fossa eru rétt við hringveginn og því tilvaldir viðkomustaðir á ferð um suðurströndina.
Hvort sem þú ert á höttunum eftir góðum myndatökustöðum, stuttum gönguleiðum eða vilt einfaldlega njóta íslenskrar náttúru sýna þessir fossar landið frá sinni hráustu og fegurstu hlið. Hér að neðan eru fossarnir á Suðurlandi sem þú mátt ekki missa af.
1. Seljalandsfoss
Seljalandsfoss er einn þekktasti og vinsælasti foss landsins. Hann fellur um 200 fet (60 m) fram af klettabrún sem eitt sinn markaði strandlínu landsins. Hann er auk þess rétt við hringveginn og því er auðvelt að komast að honum.
Það sem gerir þennan glæsilega foss sérstakan er göngustígurinn sem liggur á bak við fossinn sjálfan. Aftan við fallandi vatnið opnast útsýni yfir tún og fjöll, upplifun sem gleymist seint. Vegna stöðugs úða er vatnsheldur fatnaður eindregið ráðlagður.
2. Skógafoss
Skógafoss er kraftmikill foss þar sem breið vatnsbreiða steypist fram af hárri klettabrún við suðurströndina. Stærðin og krafturinn gera hann að einum tilkomumesta fossi Suðurlands.
Þú getur staðið nálægt fossrótinni og fundið úðann leika um þig, eða klifið rúmlega 500 þrepa stiga við hlið fossins upp á útsýnisstaði fyrir ofan. Á sólríkum dögum myndast oft regnbogar í úðanum sem eykur enn á tilkomumikla stemninguna.
3. Gljúfrabúi
Gljúfrabúi er falinn foss inni í þröngu gljúfri, aðeins stutta göngu frá Seljalandsfossi. Þrátt fyrir nálægðina við einn vinsælasta foss landsins er þar yfirleitt rólegt.
Til að komast að honum er stigið út í grunnan læk og gengið inn í gljúfrið. Þar inni er fossinn að hluta falinn á bak við klettaveggi sem skapa dramatíska og lokaða umgjörð, kyrrláta og afskekkta.
4. Kvernufoss
Kvernufoss er fallegur foss nálægt Skógum og að honum liggur stutt gönguleið frá byggðasafninu á staðnum. Margir ferðalangar aka fram hjá honum á leið að Skógafossi og því helst svæðið friðsælt.
Fossinn rennur um þröngt gljúfur með mosavöxnum klettum. Rétt eins og við Seljalandsfoss er hægt að ganga á bak við fossinn og skoða hann nánar. Þetta er gefandi viðkomustaður fyrir þau sem sækjast eftir rólegri upplifun við suðurströndina.
5. Svartifoss
Svartifoss er í Vatnajökulsþjóðgarði, á Skaftafellssvæðinu. Hann er þekktastur fyrir stuðlabergið sem rammar inn fallandi vatnið og veitti innblástur að Hallgrímskirkju í Reykjavík.
Þessar dökku, sexstrendu súlur mynduðust þegar hraun kólnaði og sprakk, og eru meðal sérstæðustu náttúrufyrirbæra landsins. Til að komast að Svartafossi þarf nokkra göngu um fallegt landslag, svo ferðin sjálf er hluti af upplifuninni. Svartifoss er austar en flestir fossar á þessum lista en er vinsæll viðkomustaður hjá þeim sem halda áfram austur eftir suðurströndinni.
6. Háifoss
Háifoss er einn hæsti foss landsins og steypist með tilþrifum ofan í djúpt gljúfur. Jökulvatn af hálendinu fæðir fossinn og skapar kraftmikla og áhrifamikla sjón. Vegna staðsetningarinnar inn til landsins er Háifoss afskekktari og minna sóttur en fossarnir nær ströndinni. Best er að heimsækja hann á sumrin þegar færðin er áreiðanlegri.
7. Gullfoss
Gullfoss er einn frægasti foss landsins og lykilviðkomustaður á Gullna hringnum. Fossinn fellur í tveimur þrepum ofan í þröngt gljúfur með gríðarlegum krafti og úða.
Vandaðir útsýnispallar gera þér kleift að upplifa fossinn frá ýmsum sjónarhornum. Búast má við að blotna í úðanum, svo regnjakki eða vatnsheldur fatnaður er nauðsynlegur.
8. Öxarárfoss
Öxarárfoss er á Þingvöllum, sem eru á heimsminjaskrá UNESCO. Fossinn rennur fram af dökku hrauni ofan í víðan hyl, umkringdur tignarlegum hamraveggjum. Til að komast að fossinum gengur þú um Almannagjá, þar sem jarðskorpuflekarnir gliðna í sundur.
Þingvellir hafa bæði sögulegt og jarðfræðilegt gildi, og við Öxarárfoss getur þú upplifað hvort tveggja, náttúru og sögu, í dagsferð um Gullna hringinn.
9. Brúarfoss
Brúarfoss er frægur fyrir skærbláan litinn sem verður til þegar jökulvatn rennur í gegnum hraunið. Liturinn gerir hann að einum af mest sláandi fossum Suðurlands.
Áður þurfti um tveggja klukkustunda göngu hvora leið til að komast að Brúarfossi. Nú hefur hins vegar verið gert bílastæði í um fimm mínútna göngufjarlægð frá fossinum. Það gerir heimsóknina einfaldari og þægilegri fyrir alla.
10. Urriðafoss
Urriðafoss er vatnsmesti foss landsins, enginn annar foss ber meira vatn. Það er ekki hæðin sem heillar heldur gríðarlegt vatnsmagnið og stöðug hreyfingin.
Þjórsá, lengsta á landsins, breið og vatnsmikil, steypist þar fram af breiðri klettabrún og skapar hráa og kraftmikla sjón. Þrátt fyrir stærðina er Urriðafoss minna sóttur en margir þekktari fossar Suðurlands.
11. Gluggafoss
Gluggafoss, einnig þekktur sem Merkjárfoss, dregur nafn sitt af bergmyndunum á bak við fallandi vatnið sem minna á glugga. Fossinn skiptist í nokkrar kvíslar og fær þannig lagskipt yfirbragð. Neðst eru þrír gluggalaga fossar og einn hár foss fyrir ofan þá.
Auðvelt er að komast að honum og hann er notaleg viðkoma á ferð um Suðurland. Þú sérð hann raunar beint frá veginum.
12. Hjálparfoss
Hjálparfoss samanstendur af tveimur kraftmiklum fossum sem falla hlið við hlið í sameiginlegan hyl. Hraunið umhverfis, sem varð til í Heklugosum, myndar sterka andstæðu við hvítfyssandi vatnið. Hjálparfoss er nokkuð inn til landsins og er því friðsælli og minna sóttur en margir fossar nær ströndinni.
Frá bílastæðinu er aðeins stutt ganga að hylnum. Á veturna er fossinn snævi þakinn og litlir ísjakar fljóta í hylnum.
13. Stjórnarfoss
Stjórnarfoss er þekktur fyrir mjúka, ávala lögun sína. Fossinn sveigist mjúklega niður í hylinn fyrir neðan og skapar rólega og fallega heildarmynd. Hann er rétt við hringveginn og þar er sjaldan margmenni, sem gerir hann að afslappandi viðkomustað á suðurströndinni.
14. Fagrifoss
Fagrifoss ber nafn með rentu: falin perla þar sem tvær 262 feta (80 m) háar bunur falla niður mosavaxinn klettavegg. Þrátt fyrir fegurðina heldur afskekkt staðsetningin gestafjöldanum í lágmarki.
Fossinn er við hina grófu fjallaleið F206. Þess vegna er best að heimsækja hann á sumrin á fjórhjóladrifnum bíl.
15. Ægissíðufoss
Ægissíðufoss er lindarfoss með tæru vatni og mildu umhverfi. Ólíkt jökulfossum er rennslið hér rólegt og jafnt allt árið. Bílastæði er í stuttri göngufjarlægð frá fossinum. Einnig liggur gönguleið frá Hellu meðfram Ytri-Rangá fyrir þau sem vilja fallega gönguferð.
Friðsælt umhverfið gerir hann tilvalinn fyrir ferðalanga sem leita að rólegri stund á fossaferð um Suðurland.
Besti tíminn til að heimsækja fossa Suðurlands
Hægt er að heimsækja fossa Suðurlands allt árið en hver árstíð býður upp á ólíka upplifun.
Sumar: Besta aðgengið að fossunum, langir og bjartir dagar og alla jafna stöðug færð til að skoða suðurströndina og svæðin inn til landsins.
Vor: Mikið vatnsrennsli í leysingum, vatnsmiklar ár og fyrstu villtu blómin birtast í landslaginu.
Haust: Færri gestir, mýkri birta til ljósmyndunar og haustlitir í umhverfinu.
Vetur: Frosið landslag, tilkomumiklar ísmyndanir og möguleiki á að sjá norðurljósin á heiðskírum kvöldum.
Athugaðu alltaf veðurspá og færð á vegum áður en lagt er af stað, sérstaklega utan sumarmánaðanna.
Hvar er gott að gista nálægt fossum Suðurlands
Gisting við suðurströndina gerir fossaheimsóknirnar mun einfaldari. Margar helstu náttúruperlurnar eru dreifðar um svæðið og góð bækistöð hjálpar til við að halda jafnvægi milli útivistar og hvíldar.
Fyrir ferðalanga sem vilja vera í nánd við náttúruna bjóða staðir eins og Black Sand Hotel kyrrláta bækistöð við suðurströndina. Hótelið stendur við svarta sandströnd og opið haf og býður friðsæla umgjörð eftir fossaskoðun dagsins.
Eftir dag við fossana kunna gestir vel að meta:
Þægileg herbergi í skandinavískum anda
Rólegt umhverfi í nánd við íslenska náttúru
Veitingar á Ómur Restaurant & Bar á staðnum
Heilsulind og vellíðunaraðstöðu til að slaka á
Vel staðsett hótel við suðurströndina veitir bæði þægindi og kyrrláta náttúru og gerir þér auðveldara að njóta Íslandsferðarinnar.
Hagnýt ráð fyrir fossaskoðun á Suðurlandi
Fossaskoðun er einn af hápunktum ferðar um Suðurland en aðstæður geta breyst hratt. Góður undirbúningur hjálpar þér að njóta upplifunarinnar á öruggan og þægilegan hátt, óháð árstíð.
Hafðu þessi ráð í huga:
Klæddu þig í vatnsheldan fatnað og trausta skó: Margir fossar mynda mikinn úða og stígar geta verið blautir eða sleipir, jafnvel í góðu veðri.
Verndaðu myndavélina eða símann: Úðinn er stöðugur við marga fossa og vatnshelt hulstur eða þurrpoki kemur í veg fyrir skemmdir.
Haltu þig á merktum stígum og virtu öryggisskilti: Stígarnir eru gerðir til að vernda bæði gesti og viðkvæma náttúru. Það getur verið hættulegt að fara út af stígunum.
Farðu varlega við brúnir og blauta kletta: Klettar og árbakkar geta verið óstöðugir og yfirborðið er oft sleipt af úða.
Athugaðu færð og veðurspá daglega: Veður getur breyst hratt og sumir vegir geta verið lokaðir eða torfærir.
Gefðu þér aukatíma fyrir óvæntar viðkomur: Suðurland launar sveigjanleika, með fallegu útsýni og skemmtilegum útúrdúrum á leiðinni.
Náttúra Íslands er kraftmikil og óútreiknanleg. Einfaldar varúðarráðstafanir tryggja örugga og ánægjulega upplifun við fossana.
Upplifðu stórbrotna fossa Suðurlands
Frá háum hamraveggjum til falinna gljúfra sýna fossar Suðurlands dramatíska fegurð landsins. Hvort sem þú gengur á bak við Seljalandsfoss eða dáist að stuðlaberginu við Svartafoss býður hver viðkomustaður upp á eftirminnilega upplifun. Rólegri fossar við ströndina bæta svo friðsælli hlið við ferðalagið.
Að skoða fallega fossa landsins er ógleymanlegur hluti af Íslandsheimsókn. Með góðri skipulagningu og þægilegri bækistöð er Suðurland kjörinn vettvangur til að upplifa náttúruna eins og hún gerist mögnuðust.
Algengar spurningar um fossa Suðurlands
Hver er fallegasti foss landsins?
Seljalandsfoss og Skógafoss eru oft taldir meðal fallegustu og tilkomumestu fossa landsins. Báðir eru rétt við hringveginn og því þægilegir viðkomustaðir þegar þú skoðar Suðurland.
Hvaða íslenski foss er þekktur sem „Golden Falls“?
Gullfoss, sem á ensku er kallaður „the Golden Falls“, er einn frægasti foss landsins. Hann er lykilviðkomustaður á Gullna hringnum og auðvelt er að heimsækja hann allt árið.
Er Gullfoss heimsóknarinnar virði?
Já, Gullfoss er einn tilkomumesti foss landsins, þekktur fyrir stærð sína og kraft. Vandaðir útsýnispallar gera hann aðgengilegan flestum gestum.
Hvaða frægi foss á Íslandi er það sem hægt er að ganga á bak við?
Við Seljalandsfoss getur þú gengið á bak við fallandi vatnið og séð fossinn frá einstöku sjónarhorni. Stígurinn getur verið sleipur svo vatnsheldur fatnaður og traustir skór eru ráðlagðir.
Má synda í fossum á Íslandi?
Nei, ekki er mælt með sundi í fossum vegna kulda, straumþunga og slysahættu. Jafnvel á sumrin getur vatnið verið hættulegt.
Er hægt að heimsækja fossa Suðurlands á veturna?
Já, margir fossar Suðurlands eru aðgengilegir á veturna og fá þá á sig tilkomumikinn, frosinn svip. Aðstæður geta breyst hratt svo nauðsynlegt er að fylgjast með færð og veðurspá.
Er ókeypis að heimsækja fossa Suðurlands?
Flestir fossar Suðurlands eru ókeypis og opnir almenningi. Á sumum vinsælum stöðum getur þurft að greiða hóflegt bílastæðagjald sem stendur undir viðhaldi á aðgengi og aðstöðu.
