Norðurljósin: Hvernig sérðu þau meðan á Íslandsdvölinni stendur
Fyrir marga vetrargesti á Íslandi er möguleikinn á að sjá norðurljósin sjálf ástæða ferðarinnar. Þetta töfrandi fyrirbæri er duttlungafullt og oft hverfult, en sjónin af norðurljósunum dansandi um himininn er upplifun sem lifir í minningunni löngu eftir að heim er komið. Í þessari grein skoðum við hvaða þættir þurfa að falla saman svo þú fáir tækifæri til að sjá norðurljósin og hvernig þú berð þig að meðan á dvölinni á Black Sand Hotel stendur.
Árstíminn
Norðurljósin eiga sér stað í lofthjúpnum allt árið um kring. Hvers vegna, gætir þú spurt, er þá alls staðar talað um sérstakt norðurljósatímabil? Svarið er einfalt: dagsbirtan, eða öllu heldur skorturinn á myrkri. Norðurljósin geta vel verið í fullum gangi á júlíkvöldi, en birtan er þá svo mikil að þú sérð ekki neitt.
Þetta breytist allt þegar líður að lokum ágústmánaðar. Um leið og kvöldin taka að dimma verður himinninn nógu dökkur til að grænu, fjólubláu og rauðu borðarnir, bogarnir og tjöldin fái notið sín svo þau taki andann frá þér. Í upphafi og lok tímabilsins eru næturnar hins vegar stystar. Undir lok apríl er birtan yfirleitt orðin of mikil á ný.
Á þeim tíma er glugginn til að sjá norðurljósin þrengri. Í desember, um hávetur, er aftur á móti myrkur í nærri 20 klukkustundir á sólarhring og þá geturðu séð norðurljósin án þess að vaka fram á nótt. Tölfræðilega sjást þau samt oftast í kringum jafndægur á vori og hausti (í mars og september), svo þú hámarkar líkurnar með því að bóka dvöl á Black Sand Hotel á þeim árstíma.
Virkni sólar
Þegar þú hefur valið réttan árstíma fyrir Íslandsferðina þurfa fleiri þættir að ganga upp. Sá mikilvægasti er virkni sólar, sem er ekki jöfn yfir árið. Hún er jafn óútreiknanleg og íslenska veðrið, sem við komum að hér á eftir, og því þarftu að vera undir það búin(n) að sjá þau kannski alls ekki.
Það á auðvitað ekki bara við um Ísland heldur alls staðar. Kosturinn við vetrarfrí á Íslandi er hins vegar sá að hér er svo margt einstakt og óvenjulegt í boði að ferðin verður eftirminnileg þó að norðurljósin láti ekki sjá sig.
Fylgstu með vef Veðurstofu Íslands, sem birtir Kp-gildið fyrir næstu daga. Sá mælikvarði er ekki óskeikull, en því hærri sem talan er á skalanum 0 til 9, þeim mun betri geta líkurnar verið. Önnur ágæt aðferð er að fylgjast með norðurljósaáhugafólki á samfélagsmiðlum og leggja við hlustir þegar það segir að eitthvað sé í vændum. Smáforrit hjálpa líka til við að meta líkurnar, sérstaklega þau sem sýna virknina á korti og skrá norðurljósasjónir í rauntíma.
Veðurspáin
Þú þarft líka heiðan himin til að sjá hvað er á seyði í lofthjúpnum. Lágskýjað og þétt skýjahula reynir á þolinmæði allra sem vonast eftir að koma auga á norðurljósin á Íslandi. En það er von: vindurinn getur feykt skýjunum burt á skammri stundu og staðan getur gjörbreyst á örfáum klukkustundum. Þú þarft ekki nema örlitla rifu af heiðum himni.
Aftur að vef Veðurstofunnar: skoðaðu vel skýjahulukortið sem fylgir veðurspánni. Þar sem þú sérð glufur í skýjunum áttu möguleika á að sjá norðurljósin, svo framarlega sem aðrar aðstæður eru réttar. Ef þú ert á bílaleigubíl hefurðu sveigjanleika til að halda í ólíkar áttir eftir því hvar útlitið er best. Skipulagðar norðurljósaferðir gera yfirleitt slíkt hið sama.
Rétt stefna
Þú þarft líka að horfa í rétta átt. Norðurljósakraginn liggur yfir norðurheimskautssvæðinu og því er það áttin sem þú átt að snúa þér í ef þú vonast eftir að sjá norðurljósin. Gakktu úr skugga um að þú horfir í rétta átt og hafir óhindraða sýn á himininn þegar þú velur þér stað til að bíða eftir norðurljósunum.
Þar sem erfitt getur verið að átta sig á réttum stað í myrkri mælum við með að þú horfir í kringum þig á daginn. Kannaðu álitlega staði með góðum bílastæðum og löglegu aðgengi. Í myrkrinu viltu ekki fálma þig áfram eftir ójöfnum slóðum.
Þú þarft jafnframt að vera vel fjarri ljósmengun, hún dregur úr litunum og gerir mun erfiðara að sjá hvað gerist á himninum. Kyrrlátur staður í sveit, fjarri borgarljósum Reykjavíkur, er góð hugmynd. Staður eins og Black Sand Hotel er fullkominn upphafspunktur fyrir norðurljósaleitina, því þar ertu í hjarta íslenskrar sveitar.
Berum augum eða gegnum myndavél
Einn algengasti misskilningurinn um norðurljósin snýr að styrk litanna. Við erum umkringd myndum á samfélagsmiðlum og frá fyrirtækjum sem auglýsa norðurljósaferðir af kappi. Sumar þessara mynda hafa farið í gegnum verulega eftirvinnslu og gefa ekki rétta mynd af því hvernig aðstæður voru í raun þetta kvöld.
Vertu með raunhæfar væntingar og hafðu í huga að meðan virknin er að byggjast upp getur verið snúið að greina norðurljósin með berum augum. Í fyrstu sérðu ef til vill aðeins gráa borða eða boga á himninum. Það er algengt á meðan augun venjast myrkrinu eftir dvöl í upplýstu rými.
Gott ráð er að lyfta myndavélinni eða símanum upp að himninum og horfa á skjáinn. Þannig sérðu miklu betur hvort um skýjaslæður er að ræða eða hvort norðurljósin eru raunverulega mætt. Þegar það er ljóst geturðu komið þér vel fyrir og notið sýningarinnar, og ef þig langar að festa augnablikið á mynd seturðu upp þrífótinn og annan myndavélabúnað.
Byrjaðu norðurljósaleitina strax við komuna
Ef þú hefur bókað nokkurra nátta dvöl á Black Sand Hotel gæti verið freistandi að geyma norðurljósaleitina fyrstu nóttina. En eftir aðstæðum getur einmitt fyrsta nóttin reynst eina skiptið sem þau láta sjá sig. Ímyndaðu þér tilfinninguna ef þú lést ekki á það reyna og færir heim með eftirsjá í farteskinu í stað norðurljósamynda.
Vertu búin(n) að skoða spárnar og ef útlitið er gott skaltu grípa tækifærið, drífa þig út og skima himininn. Jafnvel þótt þú sért þreytt(ur) eftir ferðalagið til Íslands færðu aukinn kraft um leið og ljósin taka að dansa um himininn. Og verði nóttin löng geturðu alltaf sofið út, og hvar er betra að gera það en í einu af þægilegu rúmunum á Black Sand Hotel?
